यू-१९ महिला विश्वकप क्रिकेट खेल्ने नेपाली टोलीको बिदाई

काठमाडौं : आउँदो माघ ५ गतेदेखि मलेसियामा हुने यू-१९ महिला विश्वकप क्रिकेट खेल्ने नेपाली टोलीको बिदाई गरिएको छ। उनीहरूलाई युवा तथा खेलकुद मन्त्री तेजुलाल चौधरीको उपस्थितिमा नेपाल क्रिकेट संघ क्यानले बिदाई गरेको हो। खेलाडीहरू शनिबार त्यसतर्फ प्रस्थान गर्नेछन्।
समूह ‘डी’ मा रहेको नेपालले जनवरी १८ मा पहिलो खेल बंगलादेशसँग खेल्नेछ। दोस्रो खेल जनवरी २० मा स्कटल्याण्ड र तेस्रो खेल जनवरी २२ मा अष्ट्रेलियासँग खेल्नेछ। विश्वकपका खेलअघि नेपालले दुई वार्मअप खेल पनि खेल्नेछ।
पूजा महतोको कप्तानीमा रहेको नेपाली टोलीमा सोनी पाख्रिन (उपकप्तान), साना प्रविन, ज्योत्सनीका मरासिनी, कुसुम गोदार, अलिशा कुमारी यादव रहेका छन् । यसैगरि सावित्रा धामी, तृषना विक, किरन कुमारी कुवँर, रिया शर्मा, रचना चौधरी, सिमाना केसी, स्नेहा महरा,अनु कडायत र कृष्मा गुरुङ टोलीमा समेटिएका छन् ।